Fransalı jurnalistlər Cocuq Mərcanlı kəndinə səfər ediblər 7.4.2017
Fransalı jurnalistlər Cocuq Mərcanlı kəndinə səfər ediblər
Azərbaycanın Fransadakı səfirliyinin dəvəti ilə ölkəmizdə olan bir qrup fransalı jurnalist Cəbrayıl rayonunun işğaldan azad edilmiş Cocuq Mərcanlı kəndinə səfər ediblər. Səfər Qaçqınların və Məcburi Köçkünlərin İşləri üzrə Dövlət Komitəsinin və Xarici İşlər Nazirliyinin təşkilatçılığı ilə reallaşıb.Cəbrayıl Rayon İcra Hakimiyyəti başçısının müavini Tapdıq Nəsirov media nümayəndələrinə işğal olunmuş ərazilərdə ermənilərin törətdikləri vəhşiliklər, həmçinin kəndin bərpası ilə bağlı tədbirlər haqqında Azərbaycan Respublikası Prezidentinin Sərəncamına müvafiq olaraq həmin ərazidə aparılan minadan təmizləmə və tikinti işləri barədə məlumat verib. Bildirilib ki, kənd 1993-cü ildə Ermənistan silahlı qüvvələri tərəfindən işğal edilib. Azərbaycan Ordusunun 1994-cü ilin əvvəlində keçirdiyi Horadiz əməliyyatı zamanı kənd erməni işğalından azad olunub. 2016-cı ilin aprel əməliyyatlarına qədər Lələtəpə strateji yüksəkliyi Ermənistan ordusunun işğalı altında olduğundan Cocuq Mərcanlı kəndində yaşayış qeyri-mümkün idi. Lakin ötən ilin aprel ayında Azərbaycan Silahlı Qüvvələrinin yüksəkliyi azad etməsindən sonra artıq kənddə təhlükəsiz yaşamaq imkanı yaranıb.

KİV nümayəndələrinin diqqətinə çatdırılıb ki, işğalçı Ermənistan ordusu tərəfindən tamamilə dağıdılan Cocuq Mərcanlıda birinci mərhələdə 50 evin, məktəb binasının və müvafiq infrastrukturun tikintisi həyata keçiriləcək.

Cocuq Mərcanlı kəndi haqqında ətraflı məlumat alan, tikinti işləri ilə tanış olan fransalı jurnalistlər münaqişənin sülh yolu ilə həllinə ümid etdiklərini bildiriblər.

Media nümayəndələri 23 ildir ki, burada yaşayan Həziyevlər ailəsinə də baş çəkib, çay süfrəsi arxasında söhbət ediblər. Ailənin başçısı Oqtay Həziyev deyib ki, ilk vaxtlar burada yaşamaq çətin olsa da, heç zaman doğma torpaqlarından çıxmaq barədə düşünməyiblər.

Fransalı jurnalistlər Həziyevlər ailəsinin Vətənə, torpağa bağlılığına heyranlıqlarını bildiriblər.

Horadiz şəhərinə gələn jurnalistlər Fransanın Altkirch şəhərinin adı verilmiş küçə və “Aprel şəhidlərinə xatirə” abidəsi ilə də tanış olublar.
 
 
idpsCopyright © 2017
AZƏRBAYCAN RESPUBLİKASI
QAÇQINLARIN VƏ MƏCBURİ KÖÇKÜNLƏRİN
İŞLƏRİ ÜZRƏ DÖVLƏT KOMİTƏSİ
Komitənin ünvanı: Bakı şəhəri, Tbilisi prospekti 129
Tel/fax: (99412) 430 09 21, 430 09 25
Elektron ünvan: info@refugee.gov.az