Məcburi köçkünlərə humanitar yardım verilib 4.10.2017
Məcburi köçkünlərə humanitar yardım verilib
Oktyabrın 4-də Abşeron rayonunun Masazır qəsəbəsi ərazisində məcburi köçkünlər üçün salınmış məhəllədə məskunlaşan 80 şəhid, əlil və kimsəsiz məcburi köçkün ailəsinə qardaş Türkiyənin Qızıl Ay Cəmiyyəti tərəfindən humanitar yardım kimi göndərilmiş müxtəlif ərzaq məhsullarından ibarət yardımın paylanılması təşkil olunmuşdur.
Türkiyənin Azərbaycandakı fövqəladə və səlahiyyətli səfiri Erkan Özoralın, Qaçqınların və Məcburi Köçkünlərin İşləri üzrə Dövlət Komitəsi sədrinin müavini Gəray Fərhadovun və Zəngilan Rayon İH-nin başçısı Ramiz Həsənovun da iştirakı etdiyi tədbirdə qardaş Türkiyə ilə Azərbaycanın dünya miqyasında bir-birinə ən yaxın dövlətlər olduğu, qardaşlıq və dostluq əməkdaşlığının bütün sahələrdə inkişaf etdiyi, Azərbaycan-Türkiyə əməkdaşlığının həm regionda, həm də dünyada böyük önəm daşıdığı, əlaqələrin gündən-günə daha da inkişaf etdiyi vurğulanmışdır.
Bir millət - iki dövlət kimi Türkiyənin daim Azərbaycanın, Azərbaycanın isə Türkiyənin yanında olduğunu deyən səfir bildirib ki, biz qardaş ölkə və xalq kimi bundan sonra da daim birlikdə olacağıq.
Qardaş Türkiyənin Azərbaycana həmişə hərtərəfli dəstək verdiyini, xüsusilə torpaqlarımız işğal edilən zaman ölkəmizdəki qaçqın və məcburi köçkünlər üçün göndərilən humanitar yardımların o ağır günlər üçün olduqca mühüm önə kəsb etdiyini vurğulayan Zəngilan Rayon İH-nin başçısı Ramiz Həsənov bu mənəvi dəstəyə görə bütün məcburi köçkünlər adından səfirə və türk xalqına təşəkkürünü bildirdi.
Qeyd olundu ki, göndərilmiş 325 bağlamadan ibarət bu humanitar yardımın yerdə qalanı Bakı şəhərinin müxtəlif ərazilərində məskunlaşmış əlil, şəhid və kimsəsiz ailələrə paylanılacaqdır.
 
 
idpsCopyright © 2017
AZƏRBAYCAN RESPUBLİKASI
QAÇQINLARIN VƏ MƏCBURİ KÖÇKÜNLƏRİN
İŞLƏRİ ÜZRƏ DÖVLƏT KOMİTƏSİ
Komitənin ünvanı: Bakı şəhəri, Tbilisi prospekti 129
Tel/fax: (99412) 430 09 21, 430 09 25
Elektron ünvan: info@refugee.gov.az